Тус сургууль Монгол  хүүхэд, багачууддаа  Монгол хэл, түүх соёлоо таниулах,  Монгол орон, Монголын ёс заншил, үндэсний бахархалыг  төлөвшүүлэх, АНУ-д өндөр  боловсрол эзэмшихэд нь туслах зорилготой   ажээ.  Монгол  хэл бичгийн цагаан толгой,  Монголын түүх  уншлагын,  дунд сургуулийн сурагчдын ахисан түвшний  нэмэлт сургалт  гэсэн үндсэн хэсэгтэй  эхэлж байна.

     Монгол хэл бичгийн Цагаан толгойн сургалтыг   бага насны  хүүхдийг  бичиг үсэгт сургасан олон жилийн туршлагатай, ахмад  багш  Цэцэгмаа,  түүний охин   багш О.Осоржамаа, Түүхийн хичээлийг  Гадаадын иргэдэд   Монгол хэл, ёс заншилын хичээл зааж  мэргэшсэн багш  С.Давааням,  Дунд сургуулийн   сурагчдад   ахисан түвшиний  сургалт явуулах,  их сургууль, коллеж-д элсэх зөвлөгөө туслалцаа үзүүлэх,  сургалтын  арга технологийн   ажлыг АНУ-д  энэ чиглэлээр ажиллаж  буй  Ph.D  Ц.Эрдэнэбаяр   нар хариуцан  явуулах юм байна.

  Ахмад багш  Цэцэгмаа  Монгол хэлний Цагаан толгойн сургалтыг  олон жилийн  ажлын арга, туршлага дээрээ тулгуурлан  Цагаан толгойн түргэвчилсэн  сургалтын программ  ашиглаж 16 Ням гарагийн  тодорхой цагуудад  явуулах тухайгаа ярив.

   Сургалтын хугацаа богино, долоо хоногт нэг удаа хичээллэж байгаа тул аав, ээжүүд, багш сурагчдын хамтын  хүчин чармайлтаар  таны хүүхэд  эх хэлээрээ уншиж бичиж сурна   гэдгийг   захиж хэлэв.

  Ph.D  Ц.Эрдэнэбаяр  Лос Анжелес орчимд middle, high school-д  суралцаж байгаа  Монгол хүүхэд багачуудынхаа дунд аман болон бичгийн судалгаанууд  явуулсны үндсэн дээр сургалтын чиглэлээ тогтоож байгаагаа дурдаад,   Азийн цагаачид  үр хүүхдүүдийнхээ   боловсролд хэрхэн санаа тавьдаг тухай  ярив.      

    Багш О.Осоржамаа, хүрэлцэн ирсэн   Монгол багачууд, эцэг эхчүүдэд  зочдод талархалаа илэрхийлээд залуу аав, ээжүүд  та бид үр хүүхдээ  монгол хэл соёлоо мэддэг, монгол хүн гэдгээрээ, Монголын түүх соёлоороо  бахархдаг  болгон хүмүүжүүлэх учиртайг  хэллээ.

 Ахмад настан  Вандандорж,   “MGL Academy”  Монгол сургуулийн багш нарт баяр хүргэн алд цэнхэр хадаг, цэцгийн баглаа гардуулж   Лос Анжелес орчимд ажиллаж амьдарч байгаа Монголчуудын   дунд    Монгол сургууль нээгдэж байгаагийн ач холбогдлыг  өндрөөр үнэлж    энэ   ажлын эхлэлийг тавьж байгаа   Лос Анжелес орчмын Монголчуудын холбоо,   Монгол сургуулийн хөтөлбөрийг боловсруулах ажлын хэсгийнхэнд талархалаа илэрхийлэв.

  Мөн уулзалт ярилцлагад    Калифорниа мужид суугаа  Монгол Улсын өргөмжит консул  Грэсс  Робертс  оролцож,  талархалын үг хэллээ.

     Ээж, аавууд  Цагаан толгойн сургалтад  хэдэн насны хүүхэд хамруулах,  түүхийн хичээл хэрхэн явагдах, цагаан толгой үзэж дуусаад цаашаа үргэлжлэн дараагийн шатны  унших, Монгол хэл  гэх мэт хичээл үзэх эсэх, Уйгаржин Монгол бичиг заах эсэх талаар  сонирхон асууж байсны дээр  сургуулийн тухай  зар олигтой явсангүй гэж шүүмжилж байв.   Мөн  Эрдэнэбаяр  багштай биечлэн уулзаж  зөвлөлдөж харагдана  лээ.

   Монгол хэл бичгийн цагаан толгойн сургалтад  7 дээш насны   крилл үсэг огт үзэж байгаагүй  хүүхэд багачуудыг хамруулах,  насны байдлаас  нь хамааруулаад 7-12, 13 аас дээш насны  гэж ангилж болох,  цагаан толгой үзэж дуусаад дараагийн шатны  хичээлүүд үргэлжлэх боломжтой,   түүх уншлагын сургалтыг   сонирхсон  хүүхдүүдийн дунд Монголын нууц товчоо,  бусад түүхийн   баримтуудад тулгуурлан явуулах  тухайгаа    багш нар тайлбарлав.  

   “МGL Academy” Монгол сургуулийн үүд хаалга хэн бүхний өмнө нээлттэй,   Монгол хүүхэд  багачуудад зориулсан сургуулийн цогц хөтөлбөр хэрэгжүүлж эхэлж байгаагаараа онцлогтой  ба доорхи чиглэлийн хичээл орох гэнэ

  2 дугаар сарын 3-ны Ням гаригт Цагаан толгойн хичээл   орохоос өмнө  багш нар, зохион байгуулагчидтай уулзаж  хүүхдээ бүртгүүлж  болох,    дунд сургуулийн ахисан түвшиний сургалтад хамрагдах   хүсэлтэй хүүхдээ    2 дугаар сарын эхний  15  хоногт  багтаан  бүртгүүлэх боломжтой  ажээ.

   Нээлтийн үеэр UCLA (University of California, Los Angeles)-д  архитеторын мэргэжлээр суралцдаг  нэгэн оюутан   МGL  Монгол сургуульд    Монгол хэл бичиг үзэх  сонирхолтой  байгаагаа илэрхийлж анхны  гадаад  сурагч   болов.  Тэрээр   нүүдэлчдийн гэр сууцны тухай  сонирхон судалж байгаа гэнэ.  Мөн  Монголын ТV 5  телевизийн сурвалжлагч Дөлгөөн    сурвалжлага хийж,  эцэг эхчүүд,  багш нартай  ярилцаж, санал сэтгэгдлийг нь сонсож байв.  

     “Өсөхөөс сурсан үндэсний хэл, мартаж болохгүй соёл, 

     Үхтэл орших  төрлөх  нутаг, салж болшгүй орон”     гэдэг. 

    Бидний үр хүүхэд эх хэл,  түүх соёлоо мартаад эхэлбэл    Монгол хүн гэж өөрсдийгөө  төсөөлж чадах уу.  Гадаадад  өсч торниж байгаа   хүүхдүүд  энэ тал дээр ихэд  анхаармаар санагддаг.

    Үр хүүхдээ  эрдэм боловсролтой, сайн хүн болгох юмсан гэж    хаа холын энэ орныг зорьж ирсэн.   Хэл усыг нь сайн сурч байна гэж урамшаад л   ажил амьдралаа  залгуулах гэж аав ээжүүд бид ажиллаж байгаа.  Гэтэл хүүхдүүд маань  дунд сургуулийнхаа   хичээлийг  бүрэн гүйцэд мэдэж   ойлгож байна уу? Та бид хэрхэн анхаардаг билээ?   Хүүхэдтэйгээ ажиллах арга барил  төлөвшсөн  эсэх гээд  олон асуултын   шийдэл   хэрэгтэй.  

     Холливүүдийн  хотод үйл ажиллагаагаа эхэлсэн “МGL Academy”  Монгол сургууль   та бидний үр хүүхдийн  ухаан далайн нэгэн  ундрага   байж, эрхэм баян эрдэм  номын  үйл  нь өөдрөг  болтугай.

О.Энхнасан

Лос Анжелес хот