2008-07-04
Сонгуулийн Дараах “Shock”

Манай эх оронд сонгууль болж өнгөрсний дараа хүний алтан амь үрж, соёлын үнэт өв, эд хөрөнгөд халдаж, байшин барилга шатаасан үймээн болж улмаар  цэрэг цагдаа, байлдааны машинаар  нийслэлийнхээ төвийг  мануулж онц байдал тогтоосон гэх  сүүлийн үеийн мэдээнүүд  шоконд оруулж  орхилоо.

   Үйл явдлын халуун тогооноос гарч  байгаа интернэт мэдээллийг алс  байгаа хэн хүнгүй л хүлээн авч эргэцүүлэн дүгнэж  байгаа гэж бодном. 

   Нийгмийн хуучин тогтолцоог Ленин, Сталины хөшөөтэй  нь нурааж,  хэлье гэснээ хэлж, хийе гэснээ хийх эрх чөлөөтэй, эд хөрөнгөтэй, чөлөөт сонголттой байхын билэгдэл “ардчилал” хэмээх бурханыг залсаар хориод жил болж байна.  Та бидний өнөөгийн амьдрал Монголын ардчилалын үр дүн, түгээмэл дүр зураг. Эргэн тойрноо  хар  даа. Оршин сууж байгаа газар орон байр, идэж ууж байгаа хоол,  эдэлж хэрэглэж байгаагаа хөрөнгө хогшил, харилцан солилцож байгаа мэдээлэл, мэдлэг, сүсэглэн залбирч байгаа  бурхан сахиус маань ямар байна?  Та  бид өөрсдөө энэ бүхнийг бий болгох гэж зүтгэсэн нь гарцаагүй үнэн. Бас ардчилал ивээхээ ивээж, ниргэхээ нэрмэсэн  гэвэл маргахгүй биз.

    Монгол хүний амь нас, эрүүл мэнд, хөгийн  архи, хэдэн халтар төгрөгнөөс дор  болж хоорондоо алалцаж,  эрх мэдэлтнүүд талцан уралцаад байхаар дундуур нь  чөтгөр гүйж, улс орон хэмээх үүрийг минь ганхуулж, алтан өндөгийг нь сэгсэрч болохыг, олж авсан эрх чөлөө, хөлс хүчээ шингээсэн эд хөрөнгө,  бүтээсэн үнэт зүйлээ нүд ирмэхийн зуур үгүйрүүлж болох  хэтэрсэн эрх чөлөө байж болохгүйг  эх оронд маань болж  өнгөрсөн үйл явдал харууллаа. Монголын ардчилал цусан толботой үлдэх буй заа.    

   “Цуварч явсан барнаас цугларч суусан шаазгай хүчтэй” гэдэг. Цугларч ярилцаад харыг хараар нь цагааныг цагаанаар нь ялган үнэн шударгууг тогтоох, амар амгалан амьдралыг тохинуулах уужуу тайван  ухаан, зориг тэвчээр Монгол хүн бүрт  бий.  Харин гартаа таарсан чулуугаараа шил толь хагалж, галдаж, санаандаа орсон үгсээрээ бие биенээ дайрч, булууны яс булаалдах  золбин ноход шиг  архиралдан, хэмлэлдэж эв нэгдэлээ бусниулахад хэн,  юу  хожих вэ.  Та бид эрх чөлөөт ардчилсан Монголын  үр сад. Бидний ардчиллын, эрх чөлөөний үнэ цэнэ харилцан ойлголцох, шударгуу байх, ахан дүүс, элэг нэгтний ёсоор биенээ хүндэтгэн харилцахад бий.  

   Яндаж болдоггүй далай шиг баян орны  иргэд ээ та бид. Гэтэл хайрлах хамгаалах эд хөрөнгөгүй,  хийж  бүтээсэн баялаггүй, үнэ цэнийг мэдрэх сөхөөгүй амжиргаагаа залгуулах  эдээр ядуурч, зарим нь  шуналдаа дийлдэж, хэдэн төгрөг сарвайгаад хар усаар амлуулчихвал юу ч хийхэд бэлэн болтлоо сэтгэлээр ядуурч, тэгш бус байгааг өнгөрсөн үйл явдал илрүүллээ.  Эртний түүхтэй Монголчууд бидний ингэтлээ доошоо  орсныг далимдуулж, эх орны минь баялагт нүд унагасан эд хөрөнгөтэй хэн нэгэн том, бага ялгалгүй мөнгө атгуулж архиар угжиж ганцхан дохиход хоёр саяуулаа  хоорондоо алалцаж  хойгуур нь  “Монгол орон гэж  байсан юмуу, байгаа юмуу” гээд эзэн суучих  вий  гэж айх юм.  

 

Д.Бишүүгарам                                                                                                                     Лос Анжелес хот

Бичсэн: bishuu | цаг: 01:10 | uls toriin tuxai
Холбоос | email -ээр явуулах | Сэтгэгдэл(2)
Сэтгэгдэл:


Баримттай мэдээлэлд тургуурлаж бичицгээмээр байна даа...
[хэдэн төгрөг сарвайгаад хар усаар амлуулчихвал юу ч хийхэд бэлэн болтлоо сэтгэлээр ядуурч] [мөнгө атгуулж архиар угжиж ганцхан дохиход хоёр саяуулаа хоорондоо алалцаж]

Хэрвээ жагсаалын талаар хэлсэн бол та буруу мэдээлэлтэй, МАХН-ы тараасан худлаа мэдээлэлд бас л автсан яваа бололтой... Арга ч үгүй биз дээ... хаа сайгүй тийм мэдээлэл тавигдаж бүх хүнийг тэгж ойлгуулж байхад...

Тэрнээс тэнд тэгж архи ууж агсарсан хүн ховор байсан юм, хэн нэгэн яг архи авчирч чулуу тараасан гээд байгаа бол одоогоор батлагдаагүй ямар ч баримтгүй мэдээлэл. Тэндээ зөндөө олон ТВ хувь хүмүүс бичлэг хийж байсан ч тийм зүйл нэг ч дуранд туссаныг би лав олж хараагүй байна. Хэрэв тийм бичлэг байсан бол Монгол телевиз аль хэдийнэ гаргах байсан байхаа. Би бол итгэхгүй байгаа. Угаасаа хажууд нь олон давхар зочид буудлын барилга баригдаж байгаа шүү дээ. Тэндээс чулуу байтугай нь олдох байсан байхаа. Архины хувьд бол МАХН-ы байран дотор байсан дэлгүүрээс хайрцаг хайрцгаар барьж гарч ирээд уухыг нь ууж хагалахыг нь хагалаж байгаа нь зурагтаар харагдаж л байсан.

Харин сонгуулийн талаар хэлсэн бол эхнээсээ бэлдэж худалдаж авсан байж магадгүй худалдагдсан хүмүүс нэлээдгүй байгаа гэж бодож байгаа... Гэхдээ яг баримтгүй болохоор бас л чадахгүй. Ямартай ч хууль бус болсон гэсэн нэлээдгүй баримтууд зурагтаар цацагдсан. Мэдээж хууртагдсан ард түмэн зүгээр хараад суухгүй биз дээ? Харин жагсаалыг үймээн болтол хүлээж, үймээн болгон хувиргах ёсгүй байсан л гэж бодож байна. Нэгэнт эдийн засгийн болоод улс төр авилгал, амьдралын түвшинээрээ африкийн түвшинд яваа улсын хувьд энэ зэрэгтэй байгаа нь их юм. Аль боловсролтой мэдлэгтэй гэсэн нь улс эх орноосоо дайжчихсан нь ч бас худлаа зүйл биш байхаа. Ер нь ямар ч нийгэмд тодорхой чиглүүлэгч, боловсролтой хүчин байж л бусдыг дагуулдаг. Гэвч манайд тийм тал нь дэндүү дутагдаж байна даа... АНУ-д Харвардын Их сургууль төгсөж ирсэн гэх хүн нь эрх чөлөөний орноос дарангуйлал, өшөө авалт, эрүүдэн шүүлт зэрэг юм сурсан нэгэн нь л эргэж ирэхээр бидний ирээдүй бас бүүдгэрдүү л байна. Ямартай ч харж суугаад мэхлэгдэн дарангуйлагдаж чадмааргүй, үхээд ч болсон үр хүүхэддээ эрх чөлөөтэй сайхан амьдралтай эх орныг үлдээхийг л хүсч байна даа. whew!
Бичсэн: Дондог цаг: 12:25, 2008-07-05 | Холбоос | |


Би ардчиллыг дэмждэг. Би мини дарангуй дэглэм буюу нэгэн сургуульд дөрвөн жилийг өнгөрөөсөн. Дарангуйлал бюрократизм гэж юу байдгыг сайн мэднэ шүү. Эцэстээ дарангуйлагч нь хэн ч биш болж дуусдаг юм билээ. Харин ард түмэн үргэлжилдэг юм билээ
Бичсэн: dadido цаг: 11:12, 2008-07-05 | Холбоос | |


Сэтгэгдэл бичих

Энэ бичлэг нийт 476 удаа уншигдсан.







:-)
 
xaax